Móðir Eyjólfs í skýjunum með að hann verði áfram á Íslandi: „Ég gat ekki hætt að brosa“

Elva Christina Hafnadóttir, móðir hins fimm ára gamla Eyjólfs Kristins Elvusonar, er gríðarlega ánægð með að sonur hennar fái að vera áfram á Íslandi. Norska barnaverndin hefur dregið sig út úr málinu og er það nú á könnu baraverndaryfirvalda hér á landi.

Forsaga málsins er sú að norsk barnaverndaryfirvöld sviptu Elvu Christinu forsjá yfir drengnum, en hún var búsett þar í landi ásamt móður sinni. Þegar úrskurður yfirvalda kom tók fjölskyldan saman föggur sínar og flúði til Íslands. Eftir að dómstólar fjölluðu um málið átti að senda Eyjólf út til Noregs í byrjun desember. Í gær var greint frá því að Eyjólfur myndi vera áfram á Íslandi.

„Ég reyndi að undirbúa hann fyrir þetta með því að láta hann vita hvenær hann þyrfti að fara en hann fór svo aldrei. Að fá að hafa hann þetta kvöld, að horfa á hann sofa. Ég gat ekki hætt að brosa og táraðist svolítið líka,“ sagði Elva Christina í Bítinu á Bylgjunni í morgun.

Að sögn Elvu Christinu hafa norsk barnaverndaryfirvöld dregið sig úr málinu og er það nú alfarið á könnu íslenskra barnaverndaryfirvalda. Óvíst er þó hvort Eyjólfi verði komið í fóstur hérlendis eða hvort foreldrar komi að uppeldi hans.

Elva Christina segist vona að hún fái forræði yfir Eyjólfi enda sé hún í óða önn við að koma sér á beinu brautina á ný en barnaverndaryfirvöld í Noregi gripu inn í eftir að hún leiddist út í óreglu. Elva segir að eftirlitsaðilar taki taki stöðuna á henni á hverjum degi og það hafi gengið vel.

Í nóvember staðfesti Hæstiréttur niðurstöðu héraðsdóms um að senda ætti Eyjólf til Noregs. Elva Christina segir að mjög erfitt hafi verið að segja Eyjólfi fregnirnar.

„Hjartað honum brotnaði á þessari mínútu þegar ég segi þetta við hann. Við endum í faðmlögum hágrátandi. Þetta er eitthvað sem á ekki að gerast fyrir fimm ára barn. Það er svo sárt að ég hafi þurft að segja honum þetta en sem betur fer er ég að segja við hann núna að þetta fari að lagast.“

Elva Christina er gríðarlega þakklát fyrir þann stuðning sem hún hefur fengið í baráttunni. Hún segir að hún hefði aldrei getað gengið í gegnum þetta án þess að finna fyrir stuðningi úr öllum áttum.

„Maður fær fiðring í magann hugsandi út í það að þessi litla þjóð hafi bjargað honum. Ég hefði aldrei getað gert þetta ef það væri ekki fyrir fjölmiðla og fólkið þarna úti sem sagði bara nei og þetta kæmi ekki til greina. Ég hefði aldrei getað sagt þessar gleðifréttir ef ég hefði ekki fengið þessa hjálp.“

Hlusta má á viðtalið í heild sinni hér að ofan.