Strætó hækkar verðskrá sína

Almennt fargjald í Strætó hækkar um 4,8 prósent frá og með byrjun næsta árs og fer þannig úr 420 krónum í 440 krónur. Þá hækka önnur fargjaldaform eins og farmiðar og kort um fjögur prósent en stakt fargjald fyrir börn, aldraða og öryrkja verður óbreytt.

Í tilkynningu frá Strætó segir að hækkunin sé í takt við almenna verðlagshækkun á rekstrarkostnaði fyrirtækisins. Hækkun á launakostnaði og olíuverði vegi um 70 prósent af heildarrekstrarkostnaði.

„Í eigendastefnu Strætó sem samþykkt var í apríl 2013 kemur fram að stefnt skuli að því að fargjaldatekjur standi undir allt að 40% af almennum rekstrarkostnaði Strætó. Í dag standa fargjaldatekjur undir um 32% af almennum rekstrarkostnaði félagsins,“ segir í tilkynningunni.

Ný verðskrá tekur gildi 3. janúar næstkomandi.