Stelpurnar hans Þóris vörðu titilinn

Noregur varð í kvöld Evrópumeistari í handknattleik kvenna annað mótið í röð. Þórir Hergeirsson, þjálfari liðsins, heldur því áfram að bæta við sig skrautfjöðrum. Noregur lagði Holland, 30-29, í mögnuðum úrslitaleik.

Fyrri hálfleikur var jafn og skemmtilegur. Aldrei munaði miklu á liðunum sem nánast héldust í hendur og staðan í hálfleik var 15-15.

Nora Mörk fór hamförum í norska liðinu og skoraði sex mörk í hálfleiknum. Danick Snelder skoraði fimm fyrir Holland sem var með betri markvörslu líka í fyrri hálfleiknum.

Norska liðið tók frumkvæðið í síðari hálfleik og var 1-2 mörkum yfir.  Norska liðið náði svo fjögurra marka forskoti, 24-20, er 18 mínútur voru eftir.

Hollenska liðið kom með gott áhlaup undir lokin og hefðu getað jafnað í lokasókninni. Sending úr aukakasti fór aftur á móti í hnéð samherja og Holland tapaði boltanum klaufalega sem og leiknum.

Nora Mörk endaði með tólf mörk í liði Noregs og Danick Snelder skoraði sex.

Þetta eru sjöttu gullverðlaunin sem Þórir vinnur með norska landsliðinu á sjö árum.