Keyptu allt hlutafé ISS Ísland

Hópur innlendra og erlendra fjárfesta ásamt stjórnendum ISS Ísland ehf hafa undirritað samning um að kaupa allt hlutafé ISS Ísland ehf. Samkvæmt tilkynningu er samningurinn háður fyrirvörum, en eru bæði kaupendur og seljandinn ISS World Services A/S, bjartsýnir á að eigendaskiptin gangi að fullu í gegn fyrir árslok.

Kaupverðið er trúnaðarmál.

Í tilkynningunni kemur fram að fjárfestahópurinn samanstandi af erlendum aðilum með mikla reynslu af rekstri og stjórnun þjónustufyrirtækja á heimsvísu, innlendum fjárfestum og núverandi stjórnendum ISS á Ísland.

„Meðal fjárfestanna er Patrick de Muynck, fyrrum stjórnandi hjá franska veitingafélaginu Elior Group og sænska sjóðastýringarfélagsins EQT sem m.a. átti ISS og SSP Group um árabil. Elior, SSP og ISS eru meðal stærstu fyrirtækja heims á sviði fasteigna- og veitingaþjónustu. Á meðal fjárfestanna eru að auki Peter Nilsson, fyrrum forstjóri Duni og Sanitec, Einar Sveinsson og Benedikt Sveinsson.“

ISS hóf starfsemi hér á landi árið 2000 þegar fyrirtækið keypti ræstingadeild Securitas.

„Á síðastliðnum 16 árum hefur fyrirtækið vaxið og aukið þjónustuframboð sitt verulega. Þjónusta fyrirtækisins felst í ræstingum, veitingaþjónustu, annarri fasteignaumsýslu og samhæfðum þjónustulausnum. Fyrirtækið mun starfa áfram undir merkjum ISS næstu tvö árin á grundvelli samstarfssamning við ISS World Services A/S.“

„Félagið byggir á sterkum grunni eftir að hafa verið hluti af samstæðu leiðandi aðila á heimsvísu á sviði fasteignaumsjónar. Við munum byggja á þessum grunni og nýta okkar þekkingu og reynslu til fulls til að efla fyrirtækið enn frekar og styðja stjórnendur og starfsfólk í að veita viðskiptavinum okkar áfram framúrskarandi þjónustu,“ segir Patrick de Muynck, verðandi stjórnarformaður ISS Ísland.

„Við teljum ISS Ísland mjög áhugaverðan fjárfestingarkost og aðstæður á Íslandi eru um margt spennandi fyrir erlenda aðila með fjárfestingar í huga.“

Guðmundur Guðmundsson, Forstjóri ISS Ísland, slær á svipaða strengi.

„ISS Ísland hefur átt farsælt samstarf við ISS World services frá upphafi. Fjárfesting nýrra eigenda er viðurkenning á þeim árangri og uppbyggingu sem unnið hefur verið að undanfarin ár. Við horfum bjartsýn til framtíðar og félagið fær nýja eigendur með verðmæta innlenda og alþjóðlega þekkingu sem mun nýtast félaginu og viðskiptavinum okkar vel. Fyrirtækið verður rekið áfram í óbreyttri mynd með sama starfsfólki, en það hefur verið lykillinn á bak við þennan frábæra árangur. Við stefnum ótrauð að því markmiði að verða fremsta þjónustufyrirtæki á Íslandi.“