ESA: Lánssamningar Seðlabankans við Íslandsbanka og Arion fólu ekki í sér ríkisaðstoð

Lánssamningar sem Seðlabanki Íslands gerði við Íslandsbanka og Arion banka í kjölfar bankahrunsins voru gerðir á markaðskjörum og fólu því ekki í sér ríkisaðstoð.

Þetta er niðurstaða ESA, Eftirlitsstofnunar EFTA, sem tók málið til skoðunar eftir að kvörtun hafði borist.

Í tilkynningu frá ESA segir að formleg rannsókn hafi hafist í maí 2015. „Meðan á rannsókn málsins stóð aflaði ESA gagna varðandi lánskjör í sambærilegum lánssamningum frá sama tíma, meðal annars frá aðilum málsins. Gögnin sýndu að lánaskilmálarnir sem Seðlabanki Íslands samþykkti voru í samræmi við markaðskjör á þeim tíma sem samningarnir voru undirritaðir. Með samningunum var Seðlabankinn því að verja hagsmuni sína og hámarka endurheimtur af lánunum.

ESA komst að þeirri niðurstöðu að umræddar ráðstafanir væru í samræmi við það sem almennur lánveitandi hefði gert í sömu stöðu. Þar af leiðandi fólu samningarnir ekki í sér ríkisaðstoð í skilningi EES-samningssins.

Forsaga málsins

Málið varðar tvo lánssaminga milli Seðlabanka Íslands og Íslandsbanka (áður Glitnis) og Seðlabankans og Arion banka (áður Kaupþings). Samningarnir voru undirritaðir í september 2009 og janúar 2010. Með samningunum var skammtíma veðlánum og verðbréfalánum frá Seðlabanka Íslands skuldbreytt í lán til langs tíma.

Umrædd skammtíma veðlán voru á sínum tíma veitt með veði í ýmsum skuldabréfum, þar á meðal veðum í húsnæðislánasafni bankanna tveggja. Við endurfjármögnun nýju bankanna (Íslandsbanka og Arion banka), voru innlendar eignir og skuldbindingar forvera þeirra, Glitnis and Kaupþings, færðar til nýju bankanna. Þar á meðal voru skuldbindingar gagnvart Seðlabanka Íslands. Skuldir bankanna við Seðlabankann voru í formi skammtíma veðlána.  Krafa um tafarlausa endurgreiðslu þeirra hefði haft veruleg áhrif á lausafjárstöðu nýju bankanna tveggja og dregið úr líkum Seðlabankans á að fá lánin endurgreidd að fullu,“ segir í tilkynningunni.