Aurum alltof dýrt eða kreppunni um að kenna?

Stjórnarformanni bresku skartgripakeðjunnar Aurum Holdings Limited árið 2008 og framkvæmdastjóra skartgripafyrirtækisins Damas LLC, í Dúbaí, sama ár greinir á um það hvers vegna síðarnefnda fyrirtækið hætti við að kaupa hlut í því fyrrnefnda.

Stjórnarformaður Aurum telur ástæðurnar liggja í óvissunni sem skapaðist á mörkuðum í lok sumars 2008 þegar efnahagskreppan var byrjuð að gera vart við sig og í ýmsum vandræðum sem Damas var að lenda í, meðal annars vegna framkvæmdastjórans. Framkvæmdastjóri Damas telur hins vegar að verðmiðinn sem settur hafi verið á Aurum hafi að mati stjórnar fyrirtækisins verið of hár.

Þetta kom fram við vitnaleiðslur fyrir Héraðsdómi Reykjavíkur í dag en þar fer aðalmeðferð Aurum-málsins fram. Í málinu eru þeir Lárus Welding fyrrverandi forstjóri Glitnis og Magnús Arnar Arngrímsson sem var framkvæmdastjóri fyrirtækjasviðs bankans ákærðir fyrir umboðssvik vegna sex milljarða króna lánveitingar Glitnis til félagsins FS38 í júlí 2008.

 

Þá eru þeir Jón Ásgeir Jóhannesson sem var einn stærsti eigandi Glitnis og Bjarni Jóhannesson sem var viðskiptastjóri hjá bankanum ákærðir fyrir hlutdeild í meintum umboðssvikum. 

Jón Ásgeir taldi að Glitnir myndi stórgræða á viðskiptunum

Lánið var notað til að kaupa 25,7 prósent hlut Fons í Aurum en fram hefur komið við aðalmeðferðina að Damas hafði hug á að kaupa allt að 30 prósent hlut í Aurum. Voru skartgripafyrirtækin í samskiptum vegna fyrirhugaðra viðskipta á fyrri hluta árs 2008.

Í gögnum málsins kemur fram að framkvæmdastjóri Damas hafi falast eftir aðstoð hjá Baugi til að eignast hlut í fyrirtækinu og sagði Jón Ásgeir í gær að aðkoma hans að málinu hefði falist í því að hjálpa til við að koma viðskiptunum á.

Var hugmyndin sú að Damas myndi á endanum kaupa 19 prósent af þeim hlutabréfum sem FS38 keypti af Fons en ekkert varð af viðskiptunum sem Jón Ásgeir taldi að Glitnir myndi stórgræða á.

Var verðmatið hæfilegt eða of hátt?

Ákæruvaldið telur að verðmatið á bréfunum í Aurum hafi verið of hátt. Því hafi lánið sem Glitnir veitti verið of hátt og fé bankans verið stefnt í hættu með lánveitingunni. Þessu eru sakborningar ósammála og telja að verðmatið, fjórir milljarðar króna, hafi verið raunhæft.

Vísa þeir í samtímaverðmöt fyrirtækjaráðgjafar Glitnis, fyrirtækjaráðgjafar Kaupþings og verð sem sett er fram annars vegar í bréfi framkvæmdastjóra Damas til Gunnars Sigurðssonar forstjóra Baugs og hins vegar í skjali þar sem viðskiptin voru útlistuð, en var ekki lagalega bindandi, og er svokallað „Head of Terms“.

Bæði í bréfinu frá framkvæmdastjóranum og í „Head of Terms“ er verðið sem nefnt er 100 milljónir punda. Í vitnisburði framkvæmastjórans í dag sagði hann hins vegar hluturinn hafi ekki verið meira virði en 60 til 70 milljónir punda og að stjórn Damas hefði hætt við kaupin vegna þess að verðið væri of hátt. Aðspurður hvenær hætt hefði verið við kaupin kvaðst framkvæmdastjórinn telja að það hafi verið í lok september. 

Segja engar umræður um verð hafa farið fram

Stjórnarformaður Aurum neitaði því aftur á móti að það hefði eitthvað haft með þætti sem tengdust skartgripakeðjunni sjálfri að gera að ekkert varð af viðskiptunum. Þannig hafi verðið ekkert haft með málið að gera enda hafi engar umræður um verð farið fram. 

„Þegar ég lít til baka var það í 1. lagi fjármálakreppan sem var að byrja þarna í enda júlí, byrjun ágúst sem skapaði óvissu. Og í öðru lagi, þegar ég lít til baka, þá var Damas að lenda í ýmsum vandræðum í Dúbaí. Tawhid [framkvæmdastjóri fyrirtækisins] hafði verið rekinn frá fjölskyldufyrirtæki sínu vegna viðskipta sem hann var að gera sem voru ekki góð. Ég vissi ekki af þessu en þetta bendir til að hann hafi verið óáreiðanlegur maður,“ sagði stjórnarformaður Aurum í dag.