Tærnar upp í loft eftir sextán rjúpur fyrsta daginn

Eflaust hlakkar í mörgum veiðimanninum nú þegar rjúpnaveiðitímabilið er formlega hafið. Fjöldi veiðidaga eru tólf talsins og skiptast þeir á fjórar helgar, þ.e. síðustu helgina í október og fyrstu þrjár í nóvember.

Mikill fjöldi veiðimanna gengur til rjúpna ár hvert og flestir í þeirri von að veiða í jólamatinn. Í óformlegri könnun sem gerð var inn á Facebook hópnum „Skotveiðispjallið“ hefur veiðin gengið misvel hjá mönnum eftir fyrsta veiðidag en á meðan einhverjir segjast hafa veitt yfir tíu rjúpur eru aðrir enn tómhentir.

Kláraði sinn skammt og segir þetta gott

Fréttastofa náði tali af Halldóri Svavari Sigurðssyni en hann er staddur við rjúpnaveiðar á norðausturhorninu, fyrir utan Kópasker í Öxarfjarðarhreppi. Töluverður fjöldi veiðimanna er á svæðinu að sögn Halldórs.

Af því sem hann hefur heyrt þá hefur lítið verið veitt bæði í gær og það sem af er deginum í dag. Sjálfum hefur honum þó gengið afbragðsvel en hann landaði heilum sextán rjúpum í gær og þar nemur hann staðar við.

„Ég kláraði bara minn skammt í gær. Ég veiði einungis fyrir mig og mína og það eru sextán rjúpur svo nú þegar ég er búinn að ná því þá stoppa ég. Ætli ég hafi ekki bara verið heppinn í gær með það svæði sem ég var á.“

Aðspurður um hvernig hann ætlar að eyða restinni af helginni segist hann ætla njóta sveitarinnar í rólegheitum í staðinn fyrir að vera upp í fjalli.