Sígild bók kemur aftur út

Á morgun kemur alþjóðlega metsölubókin 7 venjur til árangurs (e. 7 Habits of Highly Effective People) út í nýrri útgáfu.

„Bókin er orðin tuttugu og átta ára, en þetta er eitt af þessum klassísku ritum sem verður betra með hverju ári,“ segir Guðrún Högnadóttir, ritstjóri endurskoðaðrar þýðingar. Hún er framkvæmdastjóri og eigandi hjá Franklin Covey á Íslandi og Norðurlöndunum.

„Bókin var fyrst þýdd árið 1991 og seldist strax upp á íslensku. Við erum búin að vinna með vel á annað þúsund stjórnendum hér á landi með þetta efni síðustu árin og höfum alltaf verið beðin um íslenska útgáfu af bókinni, því erum við að verða við þeirri eftirspurn. Ég vann að endurþýðingu í sumar, í ljósi þess að hugtök og annað hafa breyst, þannig að hún er að koma út í nýrri mynd á fimmtudaginn,“ segir Guðrún.

Nýju útgáfunni fylgja umsagnir frá tuttugu og fimm íslenskum áhrifamönnum úr heimi viðskipta, menntamála, lista og almennings. „Það er gaman að segja frá því að umsagnaraðilarnir eru allt frá níu ára dreng upp í forstjóra nokkurra af tíu stærstu fyrirtækjum landsins. Þetta efni á mjög breiða skírskotun í íslenskt samfélag,“ segir Guðrún.

Bókin hefur selst í meira en tuttugu og fimm milljón eintökum á tæpum fjörutíu tungumálum og trónir enn á topp-tíu lista NY Times yfir metsölubækur.

„Þetta er sígild bók. Jim Collins, einn af frægustu höfundum í dag bæði í heimi akademíu og viðskiptalífs, skrifar inngang bókarinnar og kemst svo vel að orði að bókin nái að koma auga á stýrikerfi árangurs, einhvers konar undiröldu árangurs. Um leið og maður sækir þetta efni aftur heim þá verður þetta skýrara og einfaldara og árangurinn eftir því,“ segir Guðrún Högnadóttir.