Beina sjónum að sjálfsskaða kvenna

Fyrir helgi var ný vefsíða sett í loftið undir merkjum Út með‘a en verkefninu er ætlað að stuðla að bættri geðheilsu almennings og þá sérstaklega á meðal ungs fólks. Í ár beinist verkefnið að sjálfsskaða kvenna, sem er vaxandi vandamál, og hefur Tjarnargatan unnið nýtt myndband sem fjallar um sjálfsskaða en það má sjá á heimasíðu Út með‘a.

Myndbandinu er ætlað að vekja athygli á því að öll burðumst við með einhvers konar farangur í gegnum lífið og besta leiðin til að losna við farangurinn er að ræða vandamálin. Myndbandið býður áhorfendum upp á að hafa bein áhrif og geta þeir fjarlægt farangur leikara með því að draga línu.

Árlega leita á milli 500 til 600 einstaklingar hér á landi til heilsugæslu eða sjúkrahúsa vegna sjálfsskaða, en ungar konur eru í meirihluta þeirra sem leggjast inn á spítala vegna sjálfsskaða. Samkvæmt upplýsingum á vefsíðu Út með‘a búa um 50 þúsund manns á Íslandi á aldrinum 14-24 ára en rannsóknir hafa sýnt fram á að 10 prósent ungmenna hafa skaðað sig eða reynt sjálfsvíg, og enn fleiri íhugað það.

„Þetta þýðir að um 5.000 ungmenni á Íslandi eru að skaða sig eða hafa skaðað sig eða reynt sjálfsvíg. Fullorðnir einstaklingar sem hafa skaðað sig eru 100 sinnum líklegri en aðrir til þess að fremja sjálfsvíg,“ segir á vefsíðunni en þar má nálgast ítarlegri upplýsingar bæði um sjálfsskaða og sjálfsvíg.

Þá má lesa hér viðtal við framkvæmdastjóra Geðhjálpar í Fréttablaðinu síðastliðinn föstudag þar sem hún ræðir Út með‘a og sjálfsskaða ungra kvenna.