Átta ára stúlka lést í bílslysinu

Íbúar á Siglufirði eru harmi slegnir vegna andláts átta ára gamallar telpu frá Siglufirði sem lést í bílslysi þegar árekstur varð við vegamót Ólafsfjarðarvegar og Skíðadalsvegar um klukkan hálf fjögur í fyrradag. Íbúar kveiktu á kertum til minningar um stúlkuna í gærkvöldi.

Um var að ræða þriggja bíla árekstur en alls voru fimm í bílunum þremur. Tveir í einum bílnum, tveir í öðrum og en sá fimmti var einn á ferð í þriðja bílnum. Sá slapp ómeiddur frá árekstrinum. Hinir fjórir voru fluttir á sjúkrahús þar sem stúlkan var úrskurðuð látin.

Hinir þrír eru enn á sjúkrahúsi á Akureyri en ástand þeirra er sagt stöðugt og sjúklingarnir ekki í lífshættu. Má jafnvel eiga von á að einn þeirra verði útskrifaður af sjúkrahúsinu í dag.