Utanríkisráðherrar Íslands og Bangladesh funduðu í dag

Lilja Dögg Alfreðsdóttir utanríkisráðherra fundaði með Abdul Hassan Mahmood Ali, utanríkisráðherra Bangladesh fyrr í dag. Á fundi sínum ræddu ráðherrarnir meðal annars , loftslagsmál, efnahagsmál, samvinna á sviði sjávarútvegs og orkunýtingar og mannréttindamál. Þetta kemur fram í tilkynningu frá utanríkisráðuneytinu.

Bangladesh er í hópi þeirra ríkja sem munu finna mest fyrir afleiðingum loftslagsbreytinga vegna láglendis við sjó, og því voru loftslagsmál mikið rædd á fundinum.

Síðar í dag mun utaríkisráðherra mæla fyrir þingsályktunartillögu um fullgildingu Parísarsamningsins um loftslagsmál á Alþingi. Hún segir samninginn leggja sérstaka ábyrgð á þróuð ríki. Þeim bæri að sýna forystu þar sem þau eru í betri efnahagslegri stöðu til að takast á við vandann, auk þess að bera ábyrgð á stórum hluta losunar gróðurhúsalofttegunda.

Þá ræddu utanríkisráðherrarnir einnig samvinnu á sviði sjávarútvegs, þá sérstaklega í gegnum Sjávarútvegsháskóla Sameinuðu þjóðanna hér á landi, en nemendur frá Bangladesh hafa stundað nám við skólann.

Bangladesh hefur nýlega fengið niðurstöðu í afmörkun efnahagslögsögu sinnar og sýndi Al reynslu Íslands af sjálfbærri nýtingu sjávarauðlinda sérstakan áhuga. Lilja Dögg segir Bangladesh vera í sambærilegri stöðu og Ísland var fyrir hálfri öld og að þarlendir ráðamenn þekki vel til reynslu og þekkingar Íslendinga.