Foreldrum mjög brugðið eftir að ungir drengir fundu sprautunálar

Sex litlir drengir voru fluttir á heilbrigðisstofnun Suðurnesja um helgina eftir að hafa mögulega stungið sig á sprautunálum sem þeir fundu í nýbyggingu nærri leikvelli. Foreldrum drengjanna var mjög brugðið en drengirnir höfðu verið að leik með sprauturnar skömmu áður.

Drengirnir eru allir á aldrinum 4-5 ára og voru við leik á þessum leikvelli sem er í botnlangagötu í Innri-Njarðvík. Fyrir aftan leikvöllinn eru þessar nýbyggingar þar sem að drengirnir fóru inn og fundu sprautunálarnar.

„Ég sé bara strákinn minn og frænda hans vera leika sér fyrir utan gluggann hjá mér. Svo sé ég að það koma þrír aðrir strákar líka og þeir eru svona að leika sér að skylmast og hélt að allt væri í góðu lagi og svo stuttu seinna og svo stuttu seinna þá sé ég sprautu í glugganum og anddyrinu heima og við förum að skoða þetta og þá sjáum við að hún er með beittri nál og blóði í þannig að við vörum bara strax að kanna málin,“ Heiðrún Gunnarsdóttir, móðir eins drengjanna.

Ekki er vitað hvort strákarnir hefðu stungið sig á nálunum en þeir voru hruflaðir eftir að hafa leikið sér með þær. Eðli málsins samkvæmt þá var farið með drengina á Heilbrigðisstofnun Suðurnesja til athugunar. Heiðrún segir að foreldrunum sé mjög brugðið.

„Manni dettur ekkert í hug að eitthvað svona hættulegt leynist beint fyrir framan nefið á manni þegar börnin eru úti að leika,” segir Heiðrún.

Lögreglunni á Suðurnesjum var tilkynnt um málið og segir hún í tilkynningu að byggingin sem drengirnir fóru inn í hefur verið lengi í byggingu og engar framkvæmdir þar í gangi um nokkra hríð.

„Sko nágrannar okkar hérna fyrir aftan verða svolítið varir við og einhvern umgang að fólki og þetta er bara svona krakkasegull. Þetta er leikvöllur hérna, og krakkarnir í öllu hverfinu leika hérna við hliðina. Þannig að þetta er bara hættulegt svæði,” segir Heiðrún.

Hafið þið eitthvað heyrt í eigendum hússins?

„Nei, ekki neitt,” segir Heiðrún.

En þið vitið að eitthvað um að það sé verið að vinna í þessu núna?

„Já,” segir Heiðrún.

Lögreglan tilkynnir atvik af þessu tagi til barnaverndaryfirvalda auk þess sem haft sem samband við húseiganda með ábendingu um úrbætur á húsnæðinu. En ætli verktakar séu á einhvern hátt ábyrgir gangvart atviki sem þessu?

„Nei það held ég nú ekki. Það var búið að byrgja fyrir alla glugga og síðan hefur það verið brotið upp og greiður aðgangur fyrir börnin inn,” segir Óskar Halldórsson, aðalvarðstjóri hjá Lögreglunni á Suðurnesjum.

Óskar brýnir fyrir foreldrum að ræða þessu mál við börn sín.

„Fyrsta lagi að vera ekki að fara inn í svona byggingar þar sem þau eru hættuleg svæði. Og ef þau finna eitthvað svona torkennilegt og sem þau þekkja ekki að láta það bara í friði og tilkynna til foreldra sinna,” segir Óskar.