Leggja til breytingar til sátta á lagafrumvarpi um búvörulög

Nefndir Alþingis koma saman í dag eftir stutt sumarleyfi en næstu dagar fara í undirbúning undir þingfundi í næstu viku.

Jón Gunnarsson, formaður atvinnuveganefndar, segir að kynntar verði breytingar á búvörusamningunum á fundi nefndarinnar síðdegis.

„Unnið hefur verið að breytingum á málinu í allt sumar og við vonum að þær breytingar verði til þess að víðtækari sátt náist en þegar samningarnir voru undirritaðir í vor. Þær breytingar munum við kynna fyrir nefndarmönnum og vonandi náum við að afgreiða málið fljótt og örugglega úr nefndinni,“ segir Jón.

Nokkuð hefur verið deilt á nýgerða búvörusamninga en þeir þurfa að fá samþykki þingsins á þeim tíma sem eftir lifir fram að kosningum. Bæði hafa heyrst gagnrýnisraddir úr stjórnarandstöðunni og einnig hafa heyrst óánægjuraddir innan þingflokks sjálfstæðismanna.

Þá er deilt um fleiri mál. Katrín Júlíusdóttir, fyrsti varaformaður umhverfis- og samgöngunefndar, undrast að samgönguáætlun skuli ekki verða rædd á fyrsta degi nefndarinnar. 

„Þetta er ekki innihaldsrík fundar­dagskrá hjá okkur, það verður að segjast,“ segir hún. „Nú er svo komið að hið opinbera hefur ekki verið með gilda samgönguáætlun allt þetta kjörtímabil. Svo virðist sem formaður og varaformaður Sjálfstæðisflokksins séu ekki sammála um mikilvægi samgöngumála því drög að samgönguáætlun sem innanríkisráðherra hefur lagt fram hljóðar upp á mun hærri upphæðir en eru í fjármálaáætlun formanns flokksins,“ segir Katrín.

Ljóst er að ef ganga á til kosninga í lok október þarf að halda vel á spöðunum. Boðað hefur verið nýtt frumvarp sem draga á úr vægi verðtryggingar. Það frumvarp hefur ekki birst opinberlega og mun líklega verða mikið rætt í þinginu verði það lagt fram.

Katrín Júlíusdóttir segir þing þurfa að klárast í ágústmánuði og ef vilji sé fyrir því innan stjórnarflokkanna geti það auðveldlega gerst.

„Við sáum það í byrjun sumars að þingið getur unnið hratt og örugglega ef vilji er fyrir því innan stjórnar­flokkanna. Því gætum við unnið fljótt í um þrjár vikur og klárað fyrir lok ágúst og boðað þá til kosninga,“ segir Katrín.

Birt var uppfærð starfsáætlun þingsins á vef Alþingis í gær, en í henni er gert ráð fyrir nefndafundum 10. til 12. ágúst og þingfundum frá 15. ágúst til 2. september.

Þessi frétt birtist upphaflega í Fréttablaðinu.