Bráðabirgðayfirlit frá Seðlabanka sýnir hagstæðan viðskiptajöfnuð á fyrsta ársfjórðungi

Viðskipajöfnuður mældist hagstæður um 2,1 milljarð króna á fyrsta ársfjórðungi ársins 2016 samanborið við 7,8 milljarða króna fjórðunginn á undan. Vöruskiptajöfnuður mældist hins vegar óhagstæður sem nam 25,6 milljörðum króna en þjónustujöfnuður hagstæður um því sem nemur 26,9 milljörðum króna.

Þetta kemur fram í tilkynningu frá Seðlabanka Íslands um greiðslujöfnuð og erlenda stöðu þjóðarbúsins á fyrsta ársfjórðungi. Um bráðabirgðayfirlit frá stofnuninni er að ræða.

„Jöfnuður frumþáttatekna var hagstæður um 5,4 ma.kr. en rekstrarframlög óhagstæð um 4,5 ma.kr. Áhrif innlánsstofnana í slitameðferð á frumþáttatekjur eru hverfandi eftir  samþykki nauðasamninga í desember síðastliðnum,“ segir í tilkynningunni.

„Erlendar eignir þjóðarbúsins námu 4.215 ma.kr. í lok ársfjórðungsins en skuldir 4.347 ma.kr. Hrein staða við útlönd var því neikvæð um 131 ma.kr. eða sem nemur 5,9% af vergri landframleiðslu. Nettóskuldir hækkuðu um 4 ma.kr. eða sem nemur 0,2% af VLF á milli ársfjórðunga,“ segir jafnframt.

Á fyrstu mánuðum ársins komu til framkvæmda greiðslur innlánsstofnana í slitameðferð til kröfuhafa í formi reiðufjár en einnig voru gefin út skulda- og hlutabréf í félögunum sem afhent voru kröfuhöfunum. Eins og kunnugt eru náðust samningar við kröfuhafa íslenska ríkisins fyrir skemmstu sem hefur haft áhrif á afkomu þjóðarbúsins.

„Í lok fjórðungsins nam skuld þeirra 598 ma.kr. sem síðar verður greidd eftir því sem sölu eigna vindur fram. Verðmat á skuldum félaganna í lok árs 2015 hefur verið endurskoðað frá síðustu birtingu. Skuldirnar eru nú á markaðsverði í stað nafnverðs áður. Þessi framsetning endurspeglar betur þá fjárhæð sem áætlað er að verði að endingu greidd til kröfuhafanna.

Áhrif þessa er betri erlend staða þjóðarbúsins í lok ársins 2015 sem nemur 172 ma.kr. eða 8,8% af vergri landsframleiðslu. Hrein fjármagnsviðskipti leiddu til um 14 ma.kr. lakari erlendrar stöðu. Þar af lækkuðu erlendar eignir um 528 ma.kr. og skuldir um 514 ma.kr. vegna viðskiptanna. Gengis- og verðbreytingar höfðu neikvæð áhrif á erlenda stöðu þjóðarbúsins sem nam 103 ma.kr. á ársfjórðungnum. Gengi krónunnar lækkaði gagnvart helstu gjaldmiðlum eða að jafnaði um 1,6% samkvæmt gengisskráningarvog.“