Óska eftir upplýsingum um neytendavernd við afnám hafta

Hagsmunasamtök heimilanna hafa óskað eftir formlegu svari frá Seðlabankanum um það hvernig bankinn hyggst verja neytendur fyrir gengisfellingu og stökkbreyttum lánum þegar kemur til afnáms fjármagnshafta.

Samtökin segjast spyrja þessarar spurningar fyrir hönd sinna félagsmanna „og þeirra fjölmörgu sem eru skuldbundnir verðtryggðum neytendalánum á Íslandi.“

„Í hnotskurn er því spurt, hvaða aðgerðir standa nú fyrir dyrum hjá Seðlabankanum sem tryggja að fjárhagslegir erfiðleikar lánþega sem skuldbundnir eru verðtryggðum lánum endurtaki sig ekki?“ spyrja samtökin í fréttatilkynningu.

„Hagsmunasamtök heimilanna hafa barist fyrir réttindum neytenda á fjármálamarkaði frá því að efnahagshrun varð á Íslandi, 2008. Nú hefur Seðlabankinn kynnt áætlun um afnám fjármagnshafta sem sett voru í kjölfar þessa efnahagsáfalls sem hafði víðtæk áhrif á samfélagið.“

Óska samtökin eftir ítarlegum upplýsingum um aðgerðir til þess að tryggja almannahagsmuni hvað þetta varðar við afnám fjármagnshafta.