Starfsmönnum fiskvinnslu hótað uppsögn

Alþjóðasamtök launafólks í matvæla-ferðaþjónustu og landbúnaði (IUF) hafa leitað til Starfsgreinasambandsins vegna samskipta sinna við fyrirtækið Icelandic Group.

Fiskvinnsla Icelandic Group, Icelandic Seachill í Grimsby, stendur í samningum við starfsfólk sitt sem er allt annað en ánægt með kjör sín.

Frá apríl 2016 ber atvinnurekendum í Bretlandi að greiða samkvæmt lögum um lágmarkslaun um það bil 1.300 krónur á tímann fyrir starfsfólk 25 ára og eldra. Þeirra á meðal er fyrirtækið Icelandic Sea­chill sem ber að hækka laun um 400 starfsmanna.

Í verksmiðjunni er gerð krafa um mikla yfirvinnu og vinnur starfsfólkið 10-20 tíma á viku. Fyrir yfirvinnuna hefur verið greitt 50 prósentum hærra tímakaup. Samhliða hækkun grunnlaunanna ákvað Icelandic Group að endursemja við hvern starfsmann og lækka yfirvinnu í 25% prósentum hærra tímakaup.

Starfsgreinasambandið hefur brugðist við þessu með því að koma athugasemdum á framfæri við Icelandic Group en fyrirtækið er í eigu Framtakssjóðs Íslands. Í lýsingu Starfsgreinasambandsins á heimasíðu sinni er greint frá því að þeir starfsmenn sem hafi ekki verið tilbúnir að semja um skert yfirvinnuálag hafi fengið hótunarbréf þar sem þeim er gefinn sá kostur að endursemja eða missa starf sitt.

„Við lýsum yfir þungum áhyggjum af félögum okkar í Grimsby og lýsum yfir fullum stuðningi við kröfur þeirra. Það er ófært að íslenskt fyrirtæki hagi sér með þessum hætti og við krefjumst þess að íslensk fyrirtæki komi fram við starfsfólk sitt af virðingu og sanngirni hér á landi og erlendis. Að hóta uppsögnum er valdbeiting sem á hvergi að eiga sér stað,“ segir Drífa Snædal, framkvæmdastjóri Starfsgreinasambandsins.