70 saknað eftir að bátur sökk við strendur Líbýu

Minnst 70 manns er saknað eftir að bátur sökk út af ströndum Líbýu. Vont veður er á svæðinu og voru flótta- og farandfólkið í uppblásnum báti. 26 var bjargað um borð í ítalskt fraktskip. Strandgæslu Ítalíu barst símtal úr gervihnattasíma eftir að báturinn byrjaði að leka.

Á vef BBC kemur fram að það sem af er árinu hafi um 27.000 manns komið til Ítalíu með bátum og flestir þeirra frá Líbýu. Minnst 800 eru taldir hafa drukknað á leiðinni.

Sérfræðingar búast við því að fólki sem reyni að komast þessa leið til Evrópu muni fjölga á ný þar sem flóttafólki hefur verið gert erfitt að ferðast til Evrópu frá Tyrklandi.