Innlent

Hænuskref stigin í viðræðunum

Óli Kr. Ármannsson skrifar
Samninganefnd flugumferðarstjóra fundaði með samninganefnd Isavia og SA hjá ríkissáttasemjara fyrir hádegi í gær.
Samninganefnd flugumferðarstjóra fundaði með samninganefnd Isavia og SA hjá ríkissáttasemjara fyrir hádegi í gær. Fréttablaðið/Ernir
„Segja má að þetta hafi mjakast hænuskref áfram, en það er langt í land enn þá,“ segir Sigurjón Jónasson, formaður Félags íslenskra flugumferðarstjóra, um samningafund með fulltrúum Isavia og Samtaka atvinnulífsins hjá ríkissáttasemjara í gærmorgun. „En það er svo sem ekki mikið að frétta af þessu.“

Ótímabundið yfirvinnubann flugumferðarstjóra tók gildi sjötta þessa mánaðar.

Sigurjón segir menn þó vongóða á meðan ræðst sé við og hlutir þokist í rétta átt, en viðurkennir um leið að hægt gangi. Vika líður á milli funda, en næsti fundur hefur verið boðaður á þriðjudag.

Einhver röskun varð á flugi, bæði innanlands- og millilandaflugi, fyrstu dagana eftir að yfirvinnubann flugstjóra tók gildi. Flug hefur hins vegar gengið vandkvæðalaust síðustu daga. Sigurjón segir hins vegar ómögulegt að segja til um hvar áhrif yfirvinnubannsins kunni að koma niður næst. Það ræðst af mönnun og forföllum á hverjum stað.

Þessi grein birtist fyrst í Fréttablaðinu þann 20. apríl.




Fleiri fréttir

Sjá meira


×