Lausanne-búar prófa borgarlaun

Svissneska borgin Lausanne ætlar að fylgja fordæmi Utrecht í Hollandi og gera tilraun sem felst í því að veita íbúum borgarinnar svokölluð borgaralaun.

Um er að ræða skilyrðislausa grunnframfærslu sem felur í sér að allir fá greidda lágmarksupphæð frá ríkinu. Bótakerfi verða aflögð og þar með sparast vinna opinberra stofnana. Vinnutekjur leggjast ofan á borgaralaun. Ekki er gert ráð fyrir neinum skerðingum.

Borgarráð Lausanne, þar sem 150 þúsund manns búa, samþykkti með 39 atkvæðum gegn 37 að hefja tilraunina. Ekki liggja fyrir nákvæmar lýsingar á hvernig tilraunin mun fara fram, annað en að hún verði svipuð og í Utrecht. Einungis lítill hluti borgarbúa mun taka þátt og verður tilraunin fjármögnuð bæði af fé borgarinnar og landsins.

Áform eru um aðra slíka tilraun í Finnlandi. Tilraunin á að standa yfir í eitt ár og hefjast á næsta ári. Rætt er um að borgaralaunin muni nema um 800 evrum á mánuði eða sem samsvarar 112 þúsundum íslenskra króna.

Hér á landi hafa þingmenn Pírata lagt fram þingsályktunartillögu um borgaralaun eða skilyrðislausa grunnframfærslu.

Þessi grein birtist fyrst í Fréttablaðinu þann 20. apríl.