Kaupfélag Skagfirðinga leggur sérstakt gjald á mjólk umfram greiðslumark

Mjólkursamlag Kaupfélags Skagfirðinga leggur sérstakt gjald á alla mjólk umfram greiðslumark. Þetta var ákveðið á stjórnarfundi félagsins þann 12. apríl síðastliðinn. Mjólkurframleiðendum í Skagafirði barst nýlega bréf þar sem þeim er tilkynnt um breytingarnar. Vísir hefur bréfið undir höndum.

Þar kemur fram að gjaldið sé 20 krónur á hvern lítra á alla innvegna mjólk umfram greiðslumark. Þetta er gert vegna mikillar framleiðslu á mjólk á félagssvæðinu og öllu landinu.

Greiðslumark mjólkur er, samkvæmt Matvælastofnun, „ákveðið magn mjólkur mælt í lítrum sem ákveðið er fyrir hvert lögbýli og veitir rétt til beingreiðslu úr ríkissjóði. Kaup og sala á greiðslumarki mjólkur eru því í raun viðskipti með framleiðslurétt og þar með réttindi til að njóta beingreiðslna úr ríkissjóði.“

„Stjórn Kaupfélags Skagfirðinga samþykkir að vegna mikillar framleiðslu á mjólk á félagssvæðinu og öllu landinu, sé það óhjákvæmilegt að leggja á sérstakt gjald á mjólk umfram greiðslumark,“ segir í samþykkt fundarins.

„Erlendir markaðir eru mjög erfiðir og verðlag lágt. Því er nauðsynlegt að Kaupfélag Skagfirðinga leggi á sérstakt gjald að fjárhæð kr. 20 án vsk. pr./lítra frá og með 1. ágúst 2016 á alla innvegna mjólk umfram greiðslumark.“