Matvælastofnun lýtur nú 320 reglu- og lagabálkum

Ríkisendurskoðun hvetur atvinnuvega- og nýsköpunarráðuneytið til að endurskoða lagaramma Matvælastofnunar og kanna hvort sameina eigi allt matvælaeftirlit á eina hendi.

Í nýrri skýrslu Ríkisendurskoðunar ítrekar stofnunin ábendingu sína til atvinnuvega- og nýsköpunarráðuneytis sem snýr að endurskoðun lagaramma Matvælastofnunar og fyrirkomulagi matvælaeftirlits.

Fram kemur að starfsumhverfi Matvælastofnunar hefur tekið umtalsverðum breytingum frá því að henni var fyrst komið á fót og henni verið falin ýmis ný verkefni. Er svo komið að 20 mismunandi lög og yfir 300 reglugerðir taka til starfsemi hennar.

Að mati Ríkisendurskoðunar er aðkallandi að sett verði heildstæð löggjöf um hlutverk Matvælastofnunar enda sé skýr og gagnsæ löggjöf matvælaeftirlits til hagsbóta fyrir bæði almenning og eftirlitsskylda aðila.

„Þá hefur enn ekki verið kannað hvort ávinningur væri í því fólginn að fela sama aðila þau verkefni sem lúta að matvælaeftirliti og eru nú annars vegar á verksviði sveitarfélaganna og hins vegar á verksviði Matvælastofnunar,“ segir í frétt Ríkisendurskoðunar.

Þessi frétt birtist fyrst í Fréttablaðinu þann 21. apríl.