Eldur í einbýlishúsi í miðbæ Hafnarfjarðar

Allt tiltækt slökkviliðs Höfuðborgarsvæðisins var kallað út á áttunda tímanum í kvöld vegna elds í risi í einbýlishúsi í Gunnarssundi í miðbæ Hafnarfjarðar. 

Að sögn varðstjóra slökkviliðsins var um talsverðan eld að ræða þó að ekki hafi lagt mikinn reyk frá húsinu. Samkvæmt upplýsingum slökkviliðs var húsið mannlaust en samkvæmt heimildum Vísis búa eldri hjón í íbúðinni og voru þau ekki heima þegar eldurinn kviknaði. Íbúðin er að öllum líkindum talsvert skemmd en slökkviliðið þurfti að brjóta sér leið að eldinum í gegnum þak hússins.

Búið er að slökkva eldinn að mestu leyti og gekk slökkvistarf greiðlega og vinnur slökkviliðið nú að því að tryggja að eldurinn sé alveg slökknaður. Aðstæður voru nokkuð erfiðar á vettvangi en eldurinn kom upp í risi. Húsið er einnig staðsett innst inn í þröngri húsagötu.