Flensan að kveðja landann

Mikið hefur dregið úr tilkynningum um sjúklinga með inflúensulík einkenni að undanförnu, að því er kemur fram í frétt á vef embættis landlæknis. Þórólfur Guðnason sóttvarnalæknir segir óhætt að segja að flensan sé að kveðja landann.

„Hún er að fjara út,“ segir Þórólfur. „Það tekur alltaf nokkrar vikur að ganga yfir, þannig að það ratar kannski eitt og eitt tilfelli inn, en hún er ekkert stórt mál í samfélaginu í dag.“

Talsvert álag var á Landspítalanum eftir áramót vegna flensutilfella. Þórólfur segir flensuna hafa verið með nokkuð harðara móti í vetur en undanfarin ár.

„Hún kom nú heldur seinna í vetur en hún hefur gert undanfarin ár,“ segir hann. „Og það er held ég samdóma álit lækna á Landspítalanum að hún hafi verið harðari. Þeir fengu fleiri veika einstaklinga inn á spítalann heldur en oft áður og það voru margir einstaklingar á gjörgæsludeild.“