Fjarlægur draumur frumkvöðlanna

Áformað er að reisa 2,730 fermetra nýbyggingar sem tegngjast rúmlega 800 fermetra húsnæði sem fyrir er á meðfarðarstöð SÁÁ á Vík á Kjalarnesi.

„Með því verður öll starfsemi SÁÁ í fyrsta skipti í okkar eigin húsnæði," segir Arnþór Jónsson, formaður SÁÁ. 

Á nýrri Vík verður hægt að hýsa 61 sjúkling í meðferð í framhaldi af dvöl á sjúkrahúsinu Vogi. Í karlaálmu verða 40 einsmannsherbergi og 21 einsmannsherbergi í kvennaálmu. Átta herbergi verða sérstaklega útbúin með tilliti til aðgengis fyrir fatlaða.

Ekki er um það að ræða umfang meðferðar á vegum SÁÁ verði aukið með nýju meðferðarstöðinni á Vík. Um leið og hún verður tekin í notkun mun SÁÁ hætta starfsemi á Staðarfelli í Dölum.

Áætlaður byggingakostnaður við framkvæmdirnar er um 920 milljónir króna en endanlegt kostnaðarverð er háð útboðum. Þá liggja samningar um fjármögnun fyrir, samkvæmt upplýsingum frá SÁÁ.

Forseti Íslands hóf framkvæmdina formlega með fyrstu skóflustungunni í dag.

„Ég hef stutt SÁÁ mjög lengi og ég tel að starfsemi þess hafi komið þúsundum Íslendinga til bjargar. SÁÁ er líka vitnisburður um hvernig samtakamáttur almennings getur lyft grettistaki. Með þessum framkvæmdum hér er SÁÁ komin með alla sína starfsemi í eigið húsnæði og það hefði frumkvöðlunum eflaust þótt fjarlægur draumur," sagði Ólafur Ragnar.

Aðspurður um hvort hann hafi fylgst mikið með umræðunni í kjöflar þess að hann ákvað að gefa aftur kost á sér til embættis forseta Íslands og hvernig kosningabaráttu hans yrði háttað, sagði Ólafur Ragnar;

„Ég fylgist nú kannski ekki mjög mikið með henni en þó nokkuð. Ég er auðvitað ennþá í margvíslegum verkum sem tengjast mínum daglegu önnum og hef nú ekkert leitt hugann að því hvenær ég formlega byrja það sem menn kalla kosningabaráttu. Síðast byrjaði ég ekki fyrr en upp úr miðjum maí svo það er þónokkuð í það ennþá."