Höfðu á brott með sér mörg ár af óútgefnu efni

„Við vorum með hundrað krakka á Græna hattinum að spila, alveg sjúklega gaman og svo kemur einhver og eyðileggur þá stemningu gjörsamlega með þessu,“ segir tónlistarmaðurinn Magni Ásgeirsson sem, ásamt samkennurum sínum í tónlistarskólanum Tónrækt á Akureyri, leitar nú vitna að því þegar brotist var inn í húsakynni skólans aðfaranótt föstudags.

Óprúttnir aðilar höfðu þaðan með sér töluverð verðmæti sem Magni segir að felist þó ekki í hinum gamla tölvubúnaði sem þeir rændu úr skólanum heldur gögnunum sem finna má á hörðu diskum stúdíótölvunnar sem þeir námu á brott.

„Það voru teknir einhverjir smáhlutir sem skipta engu máli þannig séð en það sem skiptir höfuðmáli er að það var tekin turntölva sem að inniheldur ábyggilega eina eða tvær plötur sem búið er að taka upp,“ segir Magni.

Tónlistarskólinn er til húsa í Amarohúsinu í Hafnarstræti sem sjá má hér að neðan.

Tölvan hafi verið stúdíó-tölva í eigu Brynleifs Hallssonar sem er hvað þekktastur fyrir spilamennsku sína í Hljómsveit Ingimars Eydals. „Það eru ýmsir af eldri kynslóðinni búnir að vera að taka upp hjá honum og þetta er allt saman auðvitað fyrir bí því það er ekki búið að gefa þetta út,“ segir Magni. Sé því um mikil menningarverðmæti að ræða.

Stálu saxófón á fertugsaldri

Að sama skapi höfðu ræningjarnar Yamaha-saxófón á brott með sér sem hefur mikið tilfinningalegt gildi fyrir einn kennara skólans. „Afi hans gaf honum hann fyrir 35 árum síðan. Það er ófyrirgefanlegt," segir Magni og bætir við:

„Allt hitt skiptir engu máli. Þetta eru einhverjar gamlar fartölvur og eitthvað drasl sem við getum alltaf keypt aftur en þegar þú liggur á einhverju sem afi einhvers gaf honum og upptökum margra ára þá er þetta orðið svolítið persónulegt.“

Magni biðlar til allra sem kunna að hafa orðið varir við grunsamlegar mannaferðir við Amarohúsið að hafa samband við lögregluna á Akureyri sem gerir allt sem hún geti til að aðstoða tónlistarmennina.

Færslu Magna á Facebook um málið má sjá hér að neðan.