Segir föður sinn hafa verið tifandi tímasprengju

Dóttir Wayne Anthony Hawes, sem grunaður er um að hafa skotið fimm til bana í Georgíu-ríki Bandaríkjanna í nótt, segir föður sinn hafa verið „tifandi tímasprengju.“

Hún talaði við fjölmiðlamenn vestanhafs í dag en eins og Vísir greindi frá fengu lögreglumenn í bænum Appling í austurhluta Georgíu tilkynningu um skothvelli laust fyrir miðnætti að staðartíma. Þegar lögregla kom á vettvang fundust þar lík tveggja kvenna og eins karlmanns.

Sjá einnig: Skaut fimm til bana áður en hann svipti sig lífi

Skömmu síðar hafi borist tilkynning um skothvelli í um eins kílómetra fjarlægð. Þar höfðu karl og kona einnig verið skotin til bana.

Grunur beindist fljótlega að Hawes og fannst hann látinn á heimili sínu. Hann hafði gert árangurslausa tilraun til að kveikja í húsi sínu áður en fyrirfór sér.

Heimildir New York Daily News herma að fjöldamorðið megi rekja til bræði Hawes út í eiginkonu sína sem hafði farið fram á skilnað fyrr um kvöldið.

Eiginkona hans var ekki á meðal hinna látnu en talið er að skyldmenni hennar hafi verið í hópi þeirra sem létu lífið í árásunum.