LSD markaðssett sem hættulaust ferðalag

Ungt fólk sem á enga sögu í eiturlyfjaneyslu er í auknum mæli farið að nota LSD. Lögreglan hefur áhyggjur af því að verið sé að markaðsetja eiturlyfið sem hættulaust ferðalag. Yfirmaður fíkniefnadeildar varar eindregið við þessari þróun.

Lögreglan sendi frá sér yfirlýsingu þar sem nokkuð hefur borið á því að einstaklingar sem hafi enga sögu um óreglu noti LSD með tilheyrandi ranghugmyndum og sé hættulegt sér og umhverfi sínu. Runólfur Þórhallsson hjá fíkniefnadeild lögreglunnar segir að svo virðist sem að það sé í tísku að prófa LSD.

„Það er verið að markaðssetja LSD sem hættulaust ferðalag. Við viljum auðvitað vara fólk við því að þetta er ekki hættulaust. Fólk getur lent í þannig ótta- og ofsóknarástandi að það hefur enga stjórn á því hvað það er að gera. Það getur dregist í nokkra daga í verstu tilfellum,“ segir Runólfur.

LSD hefur ofskynjunaráhrif við inntöku. Áhrifin eru mikið einstaklingsbundin og umhverfið hefur talsverð áhrif.

„Fólk veit ekki hvað það er setja ofan í sig, það veit ekki styrkinn á því sem það er að taka. Lögreglan varar eindregið við neyslu á þessu hættulega fíkniefni. Þetta getur haft mjög mikil áhrif á andlega líðan fólks. Í sumum tilfellum getur þetta valdið mjög miklum andlegum erfiðleikum,“ segir Runólfur.