Bátar héldu sig fyrir utan drægi feril­vöktunar­kerfisins

TF-SIF, eftirlit- og björgunarvél Landhelgisgæslunnar, flaug í morgun út á Reykjaneshrygg vegna tveggja fiskibáta sem höfðu farið út fyrir drægi ferilvöktunarkerfa og fjarskipta. Þetta kemur fram í tilkynningu frá Landhelgisgæslunni.

Þrátt fyrir ítrekaðar tilraunir til að ná sambandi við skipin þá gekk það ekki. Önnur skip á svæðinu létu vita að þau sæu til bátanna en þar sem ekkert svar barst þótti fullreynt að ná sambandi við bátana. Því var vélin send á vettvang til að biðja bátana um að halda sig fyrir innan mörk ferilvöktunarkerfisins.

Landhelgisgæslan er með mál bátanna til skoðunar en athæfið er brot á lögum og reglugerðum.