Engin ákvörðun um breytt eignarhald Landsnets

Engar ákvarðanir hafa verið teknar um breytingar á eignarhaldi Landsnets, samkvæmt tilkynningu frá atvinnuvega- og nýsköpunarráðuneytinu. Tilkynningin er send vegna fréttaflutnings um málið.

Ragnheiður Elín Árnadóttir, iðnaðar- og viðskiptaráðherra, kom inn á eignarhald Landsnets í ávarpi sínu á vorfundi Landsnets í síðustu viku og greint var frá því í fréttum að hún vildi breytt eignarhald. Í tilkynningunni segir að hún hafi verið að vísa til skýrslu sem gerð var af nefnd sem skipuð var af þáverandi iðnaðarráðherra, Katrínu Júlíusdóttur. Nefndin skilaði skýrslunni í maí í fyrra en þar er meðal annars fjallað um mögulega hættu á hagsmunaárekstrum vegna eignarhalds orkufyrirtækja og dreifiveitna á flutningsfyrirtækinu.

Þá segir að Ríkisendurskoðun hafi skilað ráðuneytinu skýrslu á síðasta ári þar sem bent var á mikilvægi þess að efla og tryggja sjálfstæði Landsnets.

Einnig segir að Ragnheiður Elín hafi í ræðu sinni vakið athygli á þessum skýrslum og lagt til að rætt yrði með opinskáum og yfirveguðum hætti um eignarhald Landsnets til lengri tíma.