„Ekkert óeðlilegt við þetta“

„Þetta voru umsóknir sem voru búnar að liggja inni frá því í janúar og þegar ég var að gera hreint borð hjá mér og fór yfir þessar umsóknir þá fannst mér rétt að klára þennan hluta líka," segir Gunnar Bragi Sveinsson, sjávarútvegs- og landbúnaðarráðherra.

Greint var frá því í Fréttablaðinu í dag að Gunnar Bragði hefði á síðasta degi sínum sem utanríkisráðherra veitt tæplega eina milljón króna í styrki af skúffufé ráðherra. Styrkirnir voru veittir til alls fjögurra félaga.

Gunnar Bragi segir að ákveðið verklag sé viðhaft í ráðuneytinu. Umsóknir um styrki sem komi inn á borð ráðuneytisins séu afgreiddar á þriggja til fjögurra mánaða fresti og að styrkirnir séu oftast veittir til þeirra félaga sem eigi erfitt með að fá styrkveitingar annars staðar.

Verkefni sem oft falla milli skips og bryggju

„Þetta eru verkefni sem falla kannski á milli skips og bryggju og eiga erfitt með að fá styrki annars staðar, eitthvað af þeim. Svo er þetta líka spurning hvers eðlis verkefnið er þannig að ráðherra þarf að sjálfsögðu að meta það og ræða við aðra um þessi verkefni. En ákvörðunin er að sjálfsögðu ábyrgðin mín og ég taldi þetta mjög góð verkefni sem ég vildi setja þessa aura í," segir Gunnar Bragi.

Þjóðdansahópurinn Sporið fékk 250 þúsund krónur. Sömu upphæð fékk Kómedíuleikhúsið á Ísafirði vegna leikferðar til Spánar. Landsbyggðarvinir fengu 150 þúsund krónur og Landgræðsla ríkisins fékk 300 þúsund krónur vegna ráðstefnu sem á að halda í september næstkomandi.

Sjóðurinn ekki tómur

Aðspurður segist hann ekki hafa tæmt sjóðinn. „Þetta eru þrjár og hálf milljón sem eru í ráðstöfunarfé í utanríkisráðuneytinu fyrir árið 2016, þannig að það má segja að þetta sé svona aðeins rúmlega fyrir þessa þrjá mánuði sem ég hef veitt út, en það munar eiginlega engu."

Brynhildur Pétursdóttir, þingmaður Bjartrar framtíðar, gagnrýndi svokallað skúffufé ráðherra í Fréttablaðinu í dag, en hún segist þeirrar skoðunar að ekki eigi að dæla út almannafé á tilviljanakenndan hátt. Gunnar Bragi segir þetta eðlilegt kerfi.

Ekkert undarlegt við þetta

„Almennu rökin eru þau að ráðherra hafi fé til þess að setja í ákveðin verkefni, verkefni

sem eins og ég sagði áðan kannski falla á milli skips og bryggju hjá einhverjum öðrum sjóðum og þess háttar, en eru engu að síður áhugasöm og mikilvæg verkefni. Verkefni sem eru kannski til þess að styrkja samfélagið," segir hann.

„Aðalmálið í þessu er að mínu viti að það er ekkert undarlegt við þetta. Þessir fjármunir núna eru mjög litlir og voru skornir niður við hrunið en þá voru þeir töluvert hærri. En það er eðlilegt að þetta taki breytingum eins og annað, en mér finnst ekkert óeðlilegt við þetta," útskýrir Gunnar Bragi.

Uppfært 14.25: Gunnar Bragi hefur sent frá sér yfirlýsingu til fjölmiðla vegna málsins vegna fréttarinnar frá því í morgun. Þar segir hann meðal annars að verkefnin sem um ræðir miði ýmist að kjördæmi sínu eða málefnasviði utanríkisráðuneytisins. Hann segist þó ekki þekkja persónulega, að sér vitandi, neinn sem hlaut styrk.