Þessi eru tilnefnd sem nýir bankaráðsmenn Landsbankans

Tilkynnt hefur verið um tilnefningar sjö aðalmanna og tveggja varamanna í kosningu til bankaráðs fyrir aðalfund Landsbankans hf. fimmtudaginn 14. apríl næstkomandi.

Eftirtalin hafa verið tilnefnd sem aðalmenn í bankaráð Landsbankans: Berglind Svavarsdóttir, Birgir Björn Sigurjónsson, Danielle Pamela Neben, Helga Björk Eiríksdóttir, Hersir Sigurgeirsson, Jón Guðmann Pétursson, og Magnús Pétursson.

Eftirtalin hafa verið tilnefnd sem varamenn í bankaráð Landsbankans: Ásbjörg Kristinsdóttir, og Einar Þór Bjarnason.

Lagt er til að Helga Björk Eiríksdóttir verði kjörin formaður bankaráðs segir á vef Landsbankans.

Tryggvi Pálsson, formaður ráðsins, Eva Sóley Guðbjörnsdóttir, varaformaður, Jón Sigurðsson, Kristján Davíðsson og Jóhann Hjartarson, tilkynntu í mars að þau myndu ekki sækjast eftir áframhaldandi setu í bankaráðinu vegna afskipta Bankasýslu ríkisins af starfsháttum bankans.