Ekkert viðbótarfjármagn

„Það eru vonbrigði að það er ekki gert ráð fyrir viðbótarfjármagni í heilsugæsluna,“ segir Þorbjörn Jónsson, formaður Læknafélags Íslands.

Stjórn Læknafélagsins sendi frá sér yfirlýsingu í gær og lýsti áhyggjum af fjármögnun heilsugæslu á höfuðborgarsvæðinu. Útboðsgögn fyrir rekstur þriggja nýrra heilsugæslustöðva voru kynnt á föstudaginn hjá Sjúkratryggingum Íslands. „Markmiðið er að bæta þjónustu við íbúa á höfuðborgarsvæðinu. Það gerist ekki með því að dreifa krónunum á fleiri staði.“

Þorbjörn segir rekstur heilsugæslunnar nú þegar undirfjármagnaða og segir stjórn Læknafélagsins skora á stjórnvöld að bæta úr og auka fjármagnið. „Það væri dapurlegt ef fáir eða engir treysta sér til þess að standa að rekstri stöðvanna af raunverulegum áhuga. Hugmyndin þarf að vera fullútfærð því það er stefnt að því að afgreiða þessi mál tiltölulega fljótt, eða fyrir lok maí.“ 

Fréttin birtist fyrst í Fréttablaðinu 13. apríl