Þingmenn munu funda um reglur hagsmunaskráningarinnar

Forseti Alþingis, Einar K. Guðfinnsson, boðaði við upphaf þingfundar í dag til fundar með þingmönnum til að fara yfir reglur um hagsmunaskráningu þeirra. Hann tók fram að þegar þessar reglur voru settar fylgdi engin greinargerð með sem hægt væri að styðjast við og þess vegna væri nauðsynlegt að funda með þingmönnum svo ekki sé mismunandi skilningur á reglum um hagsmunaskráningu.

Hann sagði það vera undir þingmönnum komið hvernig þeir umgangast hagsmunaskráninguna. Hann sagði óhægt um vik fyrir Alþingi að veita slíkri skráningu eftirlit og nefndi þar sem dæmi skráningar þingmanna á boðsferðum sem eru greiddar af öðrum en Alþingi eða hinu opinbera. Hann sagði það ekki augljóst í hvert skipti hvort þingmenn séu staddir erlendis á eigin vegum, hið opinbera eða öðrum hætti.

Hann sagði þingmenn sækja sitt vald til almennings og eigi að standast reikningsskil gagnvart almenningi. Hann sagði því tilefni fyrir þingmenn að fara yfir þessar reglur með almennum hætti. Hann sagði nauðsynlegt að þingmenn væru vakandi fyrir því að þeir skrái sjálfir hluti í hagsmunaskrá og uppfæri hana ef breytingar verða á fjárhagslegum högum.