Samkeppnislög kæmu ekki í veg fyrir sameiginlegt kjararáð lífeyrissjóðanna

Samkeppnislög ættu ekki að hindra að lífeyrissjóðir komi á fót sameiginlegu kjararáði.

„Samkvæmt 2. gr. samkeppnislaga taka þau ekki til launa eða annarra starfskjara launþega samkvæmt kjarasamningum,“ segir Páll Gunnar Pálsson, forstjóri Samkeppniseftirlitsins, um hugmyndir Bolla Héðinssonar um að lífeyrissjóðir komi á fót sameiginlegu kjararáði sem ákvarði laun stjórnenda þeirra fyrirtækja sem lífeyrissjóðirnir eiga.

Í Fréttablaðinu í gær segir Bolli að lífyeirssjóðir ættu að notfæra sér það afl sem þeir hafi sameiginlega til að reyna að hindra launaskrið. Hann vill að kjararáðið verði sjálfstæð nefnd sem úrskurði um laun stjórnenda fyrirtækja í eigu lífeyrissjóða.

Páll Gunnar segir að ef samstarf lífeyrissjóðanna taki ekki til fleiri atriða falli samstarfið utan gildissviðs samkeppnislaga.

Guðrún Hafsteinsdóttir, formaður Lífeyrissjóðs verslunarmanna og formaður Samtaka iðnaðarins, telur hugmyndina ganga of langt í átt að miðstýringu atvinnulífsins. 

„Ef lífeyrissjóðirnir ætla að taka sig saman til að móta launastefnu fyrir fyrirtækin í landinu, þá finnst mér eitthvað rangt við það.“

Guðrún bendir á að unnið sé að nýju vinnumarkaðsmódeli. „Þar sem við ætlum að færa okkur nær skandinavísku þjóðunum. Þar erum við að láta útflutnings- og samkeppnisgreinarnar skapa það svigrúm sem til er til launahækkana, það er miklu eðlilegra en að við förum að búa til miðstýrt ráð sem á að gera það,“ segir Guðrún.

Fréttin birtist fyrst í Fréttablaðinu 14. apríl.