Þröstur telur kjúklinga geta styggt veiðimenn

Áætlun eiganda Jarlsstaða í Landsveit, Þórs Þorsteinssonar, um að koma upp kjúklingabúi fyrir sextíu þúsund fugla bíður enn afgreiðslu hjá Rangárþingi ytra þar sem rannsókn á áhrifum starfseminnar á vatnsvernd á svæðinu er ólokið.

Þórarinn hafði í samvinnu við Sláturfélag Suðurlands áður haft áform um uppbyggingu sömu kjúklingabúa annars staðar í landi sínu. Verkefninu var hafnað í desember síðastliðinn af Rangárþingi ytra vegna nálægðar við vatnsverndarsvæði. Þór sótti þá um leyfi fyrir fuglahúsunum á nýjum stað.

Fram kemur í umsögn sem verkfræðistofan Mannvit gerði fyrir Þór að ætlunin sé að nota hænsnaskít sem falli til á búinu sem áburð á 300 hektara lands. Lindarvatni við svokallað Kerauga stafi ekki hætta af frárennsli frá búinu. Engu að síður ákvað sveitarfélagið að kanna nýja staðsetningu með tilliti til grunnvatnsrennslis á svæðinu og stendur sú rannsókn enn.

Í millitíðinni hafa borist athugasemdir frá ýmsum í nágrenninu. Þröstur Elliðason, veiðileyfasali og leigutaki urriðaveiðiárinnar Minnivallalækjar, mótmælir harðlega í tölvubréfi til Rangárþings ytra.

„Fyrst og fremst vegna væntanlegs fnyks frá búinu sem bærist yfir svæðið, ekki beint aðlaðandi fyrir hina fjölmörgu erlendu veiðimenn sem í lækinn sækja á hverju ári,“ skrifar Þröstur sem kveður hugsanlega mengun vekja áhyggjur. „Er mikið í húfi fyrir leigutaka og landeigendur að lækurinn verði ekki fyrir skaða af völdum þessarar starfsemi og ekki réttlætanlegt að taka þá áhættu með þessum hugmyndum. Stangveiði er stunduð í Minnivallalæk frá 1. apríl og út september. Afkomendur fyrri ábúenda og núverandi sumarhúsaeigendur í landi Stóru-Valla mótmæla einnig harðlega. Þeir gera meðal annars athugasemdir við yfirvofandi lyktarmengun og háværan hvin frá loftræstingu slíkra kjúklingabúa sem rjúfa muni kyrrðina allan sólar­hringinn. Sömuleiðis óttast þeir grunnvatnsmengun.

„Búast má við lyktarmengun þegar vindur stendur að frístundabyggð og óásættanlegt að bjóða upp á slíkar aðstæður á svæði sem fólk sækir sérstaklega til að upplifa kyrrð og hreint loft í Landsveit,“ segir í bréfi sem fjórir sumarhúsaeigendur skrifa til skipulagsstjóra Rangárþings ytra. Þeir segja einnig áformum um frekari sumarhúsabyggð ógnað. „Ekki verður séð að þetta tvennt gangi saman.“