Álverin hefðu tekið 90 % meiri orku

Hefðu áform um byggingu álvera í Helguvík og á Bakka gengið eftir hefði það útheimt tæplega þúsund megavött af orku, en orkuþörf tveggja kísilvera sem eru að taka þar til starfa á næstu misserum er aðeins tíundi hluti þess sem rekstur álveranna tveggja hefði útheimt.

Þetta kom fram í máli Harðar Arnarsonar, forstjóra Landsvirkjunar, á ársfundi fyrirtækisins á fimmtudag, sem gerði grein fyrir rekstri fyrirtækisins og þeim breytingum sem eru staðreynd í viðskiptaumhverfi fyrirtækisins.

Þar vísaði hann til áforma um uppbyggingu orkufreks iðnaðar í Helguvík og á Bakka sem hefur um árabil verið á teikniborðinu. Í stað álveranna hafa komið kísilver PCC á Bakka þar sem aflþörfin er 58 megavött (MW) fyrir fyrsta áfanga og hins vegar kísilvers United Silicon með aflþörf upp á 35 MW. Þetta eru tveir nýjustu viðskiptavinir Landsvirkjunar sem hefja rekstur á þessu og næsta ári.

Hörður lýsti því að eftirspurn eftir raforku fyrirtækisins er meiri en hægt er að anna – og það eru ekki aðeins stóriðjufyrirtæki sem berja að dyrum. Það eru gagnaver sem hafa tekið til sín 30 MW frá árinu 2012 til dagsins í dag. Það er líka grænn iðnaður, aukin notkun rafmagns á almennum markaði, í ferðaþjónustu og rafvæðingu í sjávarútvegi. Orkuskipti í samgöngum, nefndi hann einnig.

Þeirri spurningu var beint til Harðar á fundinum hvaða skilaboð stjórnendur Landsvirkjunar hefðu tekið til sín úr nýrri skoðanakönnun sem Félagsvísindastofnun Háskóla Íslands gerði fyrir verkefnisstjórn rammaáætlunar, og sýndi að sextíu pró­sent lands­manna eru and­víg því að virkja til að auka stór­iðju á Íslandi en aðeins fimmtán pró­sent eru því fylgj­and­i.

Hörður sagði að niðurstaðan „mótaðist kannski af góðu efnahagsástandi“ en það væri áhugavert að í sömu könnun hafi komið fram að 75 prósent svarenda væru því fylgjandi að virkja fyrir fjölbreyttan iðnað, sem mikil eftirspurn væri eftir og rúmlega 80 prósent fylgjandi því að virkja fyrir orkuskipti.

„Þannig að það fer mjög mikið eftir því í hvað orkan er notuð hver stuðningurinn er, og ég held að það sé hlutur sem við þurfum að taka tillit til,“ sagði Hörður í svari sínu.

Fréttin birtist fyrst í Fréttablaðinu 16. apríl.