Þrír handteknir með ætlað þýfi

Lögreglan á höfuðborgarsvæðinu fékk tilkynningu skömmu eftir miðnætti í nótt um bifreið á röngum skráningamerkjum. Þegar lögreglumenn mættu á vettvang kom í ljós að þrír karlmenn voru í bílnum ásamt talsverðu magni af ætluðu þýfi. Mennirnir voru handteknir og vistaðir í fangageymslu vegna frekari rannsóknar.

Þá fékk lögreglan tilkynningu um líkamsárás á skemmtistað í miðbænum laust fyrir klukkan tvö í nótt. Þar hafði karlmaður verið sleginn í andlitið en hvorki tangur né tetur sást af ætluðum geranda. Maðurinn var fluttur á slysadeild til frekari skoðunar á áverkum.

Í Hafnarfirði var tilkynnt um gangandi konu sem virtist „ofurölvi“ skömmu fyrir miðnætti. Að sögn innhringjanda var konan með tvær ferðatöskur og við nánari eftirgrennslan kom í ljós að hún átti ekki í nein hús að venda. Konan verður vistuð í fangageymslu þar til af henni rennur.

Lögreglunni var einnig gert viðvart um heimilisofbeldi og líkamsárás í Grafarholti á fimmta tímanum í nótt. Þar var karlmaður handtekinn á vettvangi og var hann vistaður í fangageymslu vegna frekari rannsókna.