Veðurstofan varar við stormi og mikilli snjókomu

Veðurstofan vill vekja athygli á því að búist er við talsverðri eða mikilli snjókomu norðaustantil á landinu síðdegis á morgun.

Búist er við stormi, með meðalvindi meira en 20 metrum á sekúndu, á Vestfjörðum í nótt og fyrramálið, en suðaustan- og austanlands undir kvöld á morgun. Spáð er vindhviðum um eða yfir 40 metra á sekúndu sunnan undir Vatnajökli annað kvöld með líkum á sandfoki.

Athygli er að sama skapi vakin á að spáð er snjókomu á morgun og fram eftir mánudegi. Dæmigert snjómagn sem fellur á umræddu tímabili gæti verið 10 til 20 sentimetrar á Vestfjörðum og Norðvesturlandi, en 20 til 30 sentimetrar frá Tröllaskaga og allt austur á Austfirði.

Þessar snjódýptartölur eiga við jafnfallinn snjó, en það verður hann ekki því spáð er miklum vindstyrk og því mun draga í skafla. Líklegt er að færð spillist, sérílagi á fjallvegum, þar sem verður stórhríð þegar verst lætur. Einnig má búast má við að snjóflóðahætta geti skapast til fjalla á norðurhelmingi landsins.

Veðurhorfur á landinu til miðnætti annað kvöld.

Suðvestan 5 til 13 metrar á sekúndu og væta í flestum landshlutum. Hiti 3 til 8 stig. Gengur í norðaustan storm á Vestfjörðum í nótt með snjókomu. Hvessir af norðri annars staðar á landinu á morgun, víða 13 til 20 metrar á sekúndu síðdegis, en 18 til 25 annað kvöld suðaustan- og austanlands.

Slydda og síðar snjókoma á norðurhelmingi landsins, talsverð eða mikil úrkoma frá Tröllaskaga og allt austur á norðanverða Austfirði. Stöku skúrir eða él syðra. Kólnandi veður, hiti um frostmark seint á morgun, en frostlaust syðst.