Löggilding starfsheitis heilsunuddara komi í veg fyrir áreiti

Íslenskir heilsunuddarar af báðum kynjum verða reglulega fyrir kynferðislegu áreiti í starfi sínu. Formaður Félags heilsunuddara segir félagið sorglega lítið geta gert, þar sem þau séu hvorki með séttarfélag né kjarasamninga, en löggilding starfsheitisins fæst ekki samþykkt af Velferðarráðuneytinu.

Um 180 meðlimir eru í félagi heilsunuddara á Íslandi. Nám til heilsunuddara er þrjú ár og á bilinu 15-20 manns útskrifast úr því á hverju ári. Reglulega koma upp atvik þar sem nuddarar af báðum kynjum lenda í kynferðisáreiti í vinnunni.

„Nudd er eina starfsstéttin svo ég viti til sem er notuð sem yfirskin fyrir vændi. Þetta vita allir. Það hefur komið fyrir að nuddarar í sakleysi sínu hafa sett inn smáauglýsingu einhverstaðar og hafa bara fengið til sín hrúgu af kúnnum sem eru að leita að annari þjónustu. Við hjá félaginu getum sorglega lítið gert í þessu og það þykir okkur mjög leiðinlegt. Við bendum fólki þó á að tala við lögreglu,“ segir Unnur Kolka Leifsdóttir, formaður Félags heilsunuddara. 

Ástæðan fyrir úrræðaleysinu er að félagið getur ekki stofnað stéttarfélag með kjarasamningum þar sem starfsheiti heilsunuddara fæst ekki löggilt. Því gera nuddara aðrar ráðstafanir sín á milli við aðstæðum sem upp geta komið.

„Það eru óskrifaðar reglur meðal nuddara. Ein ef þessum reglum er að vera ekki ein að nudda ókunnugt fólk. Önnur regla sem er kannski óvenjuleg er að fólk auglýsir sig ekki í smáauglýsingum blaða. Frekar að dreifa nafnspjöldum, láta orðið ganga og eitthvað slíkt,“ segir Unnur. 

Félag heilsunuddara hefur í tuttugu ár reynt að fá starfsheitið heilsunuddari löggilt en ekki haft erindi sem erfiði. Síðast var lögð inn umsókn fyrir þremur árum en í vikunni hafnaði Velferðarráðuneytið henni. Var sú ákvörðun meðal annars rökstudd þannig að ekki væri þörf á fleiri löggiltum heilbrigðisstéttum í íslensku heilbrigðiskerfi að svo stöddu. Unnur gefur lítið fyrir þau rök og segir íslenskt nuddnám mjög gott á alþjóðlegan mælikvarða. Hún telur að löggildingin myndi breyta miklu fyrir stéttina. 

„Ég held að þetta sé kannski eina leiðin fyrir okkur til að verja okkur fyrir þessu. Það er margt annað sem ég get talið upp en þetta er kannski eitt það brýnasta, að við getum verndað okkar stétt með þessum hætti.“