Auknar líkur á nýrnakrabbameini

Niðurstöður nýrrar rannsóknar sem unnin er af læknum á skurðsviði Landspítala og Hjartaverndar sýna að áhætta á nýrnafrumukrabbameini er marktækt aukin hjá þeim sem vinna við flugvirkjun, skipasmíðar og húsamálun. Nýrnafrumukrabbamein er lang algengasta nýrnakrabbameinið, eða í 85% greininga.

„Vert er að taka fram að margt hefur breyst í starfsumhverfi þessara stétta. Ákveðin efni hafa verið bönnuð, til að mynda blý í málningu og leysiefni,“ segir Tómas Guðbjartsson, læknir og forsvarsmaður rannsóknarinnar.

Við rannsóknina var annars vegar notast við gögn úr Reykjavíkurrannsókn Hjartaverndar sem nær til tæplega 19 þúsund manns og hins vegar 910 sjúklinga sem greindust með nýrnafrumukrabbamein á Íslandi á 35 ára tímabili. Þannig var mögulegt að leiðrétta fyrir öðrum áhættuþáttum, t.a.m. þyngd, reykingum, háþrýstingi, kyni og aldri. Eftir stendur að það er tvö- til fjórfalt meiri áhætta fyrir þessar starfsstéttir að fá meinið.

Tómas segir niðurstöðurnar kalla á frekari rannsóknir.

„Við vitum ekki nákvæmlega hvað það er í starfsumhverfi þessara stétta sem veldur þessu því þetta eru ekki það mörg tilfelli. Ein rannsókn svarar ákveðnum spurningum en kveikir líka margar nýjar. Því væri nærtækast að fara í samtarf við önnur lönd, slá saman þessum niðurstöðum við aðrar rannsóknir sem hafa verið gerðar og rannsaka frekar.“

Minna er vitað um orsakir nýrnafrumukrabbameins en flestra annarra krabbameina. Tómas segir rannsóknina því fylla upp í ákveðin göt og vera mikilvægt framlag á alþjóðavísu.

„Við höfum einstakt umhverfi hér á Íslandi til að rannsaka svona þrátt fyrir fæðina. Hjartaverndarrannsóknin, sem hefur verið gerð í fjölda áratuga og hefur að geyma víðtækar upplýsingar um mikinn fjölda, er gulls ígildi. Þá skrá gátum við sameinað krabbameinsrannsókninni og fengið afra mikilvægar upplýsingar um áhættuþættina.“

Um þrjú prósent krabbameina sem greinast á Íslandi eru nýrnafrumukrabbamein. Árlega greinast um fimmtíu manns hér á landi með sjúkdóminn, helmingi fleiri karlar en konur og eru flestir um sextugt við greiningu.

Fréttin birtist fyrst í Fréttablaðinu 18. apríl.