„Stöðugleikinn er okkur nauðsynlegur“

Willum Þór Þórsson, þingmaður Framsóknarflokks, segir hættu á að fólk gleymi sér í því kappi sem fylgi þingkosningum. Kosningafjárlög sem þekkist í sögunni sé besta dæmið um það.

Þetta kom fram í máli hans á Alþingi í dag. Hann sagði ríkisstjórnina hafa náð langt og að mikilvægt sé að halda áfram að ná frekari árangri.  Staðreynd sé að hér hafi náðst markverður efnahagslegur stöðugleiki allt kjörtímabilið með batnandi hag á mörgum sviðum og að atvinnuástand sé með besta móti.

„Stöðugleikinn er hreint ekki sjálfgefinn og það hefur náðst mikill árangur á því sviði. Mikilvægast er að við höldum áfram að vinna að því að bæta þau tæki og tól sem geta áfram tryggt efnahagslegan stöðugleika,“ sagði Willum Þór og vísaði til þingkosninganna sem fyrirhugaðar eru í haust.

„Ég held því ekki fram að þingkosningar raski endilega stöðugleika, þær eru alla jafna á fjögurra ára fresti, en það er viss hætta á að við gleymum okkur í því kappi sem fylgir. Kosningafjárlög sem við þekkjum í sögunni eru kannski besta dæmið um það.“

Þá sagði hann breytingar í formi þróunar æskilega framvindu. „En stöðugleikinn er okkur nauðsynlegur.“