Skiptar skoðanir og ósætti í stjórnarliðinu

Ekki var einhugur meðal þingmanna Sjálfstæðisflokksins um tillöguna. Ekki var kosið um tillöguna heldur var hún tilkynnt þingmönnum. „Það voru bara allir kostir slæmir í þessari stöðu, þetta var tillaga formanns og ákvörðun hans. Tíminn verður að leiða það í ljós hversu vel þetta gengur,“ segir Unnur Brá Konráðsdóttir um málið.

Um ákvörðunina að halda kosningar í haust segir hún: „Ég sé ekkert að því að hafa kosningar sem fyrst ef þetta er niðurstaða flokksins.“

Guðlaugur Þór segir að þrátt fyrir skiptar skoðanir þá styðji þingflokkurinn ákvörðun Bjarna. „Við fólum Bjarna það að klára þetta mál sem hann og gerði með Sigurði Inga. Hann hafði ekki til þess mikinn tíma og þetta er niðurstaðan og við styðjum Bjarna í því.“ Spurður um hvort hann sé ósáttur við að Framsókn hafi haldið forsætisráðherra­- ­stólnum segir hann að nú sé mjög erfitt að fara í nýja stjórnarmyndun og skipta á ráðuneytum.

Guðlaugur Þór segir þó Sjálfstæðisflokkinn alltaf til í kosningar.

Vigdís Hauksdóttir þingmaður Framsóknar og formaður fjárlaganefndar segist sátt við Lilju Alfreðsdóttur í ráðherraembætti. Hún segist hins vegar sár yfir því að það hafi verið gengið framhjá henni í annað sinn. „Ég er afar sátt við Lilju, þetta er fær kona. En forysta flokksins finnst mér hafa gengið fram hjá mér í annað sinn,“ sagði Vigdís skömmu eftir blaðamannafund í Alþingishúsinu. Hún segist að öðru leyti sátt við starf sitt sem formaður fjárlaganefndar. Ákvörðun um að skipa Lilju í embætti kom nokkuð á óvart en því hafði verið spáð að Ásmundur Einar Daðason myndi taka við landbúnaðar-og sjávarútvegsráðuneytinu af Sigurði Inga. Höskuldur Þór Þórhallsson þingmaður Framsóknar gerði mikinn usla í Alþingishúsinu þegar hann greindi fjölmiðlamönnum frá niðurstöðu fundar þingflokks Framsóknarflokksins. Uppákoman var hin fjörlegasta en hann trúði því að Sigmundur Davíð hefði greint frá niðurstöðu þegar hann gekk af fundi skömmu áður.

Höskuldur hafði áður staðið einn á móti tillögu Sigmundar Davíðs Gunnlaugssonar fráfarandi forsætisráðherra á þriðjudag.

Höskuldur segist styðja það að Sigurður Ingi Jóhannsson yrði forsætisráðherra. Hann hefði hins vegar ekki stutt tillögu Sigmundar í heild.

„Vegna þess að það var mitt einlæga mat á þeim tíma sem að hún var lögð fram að tillagan í heild sinni myndi ekki leysa vandann. Eins og síðar kom á daginn.“

Þegar Sigmundur Davíð lætur af embætti forsætisráðherra er enginn ráðherra í sterkasta vígi Framsóknarflokks í norðausturkjördæminu en Höskuldur Þór er annar þingmaður í því kjördæmi á eftir Sigmundi Davíð.

Fréttin birtist fyrst í Fréttablaðinu 7. apríl.