Guðbrandur ráðinn til Heimavalla

Guðbrandur Sigurðsson hefur verið ráðinn framkvæmdastjóri leigufélagsins Heimavalla og mun hann hefja störf föstudaginn 1. apríl 2016.

Guðbrandur var nú síðast framkvæmdastjóri hjá PwC á Íslandi frá árinu 2013. Þar áður var hann framkvæmdastjóri Plastprents frá 2010-2012, samhliða því að reka félag sitt Nýland, sem stofnað var árið 2008 og sinnir útflutningsverkefnum og ráðgjöf.

Guðbrandur var einnig forstjóri Mjólkursamsölunnar árin 2005-2008 og framkvæmdastjóri ÚA á Akureyri, síðar Brims, á árunum 1996-2004.

Heimavellir hafa auglýst leiguíbúðir sínar fyrir einstaklinga og fjölskyldur til langtímaleigu á hinum almenna markaði. Félagið á fasteignir víðsvegar um landið, á höfuðborgarsvæðinu, Suðurlandi, Vesturlandi og Vestfjörðum og heilu fjölbýlishúsin í Borgarnesi, á Akranesi, Selfossi og Þorlákshöfn. Heimavellir byggja á gömlum grunni, en félagið myndaðist úr sameiningum nokkurra smærri fasteignafélaga samhliða hlutafjáraukningu. Hluti af uppruna félagsins kom út frá kaupum af Íbúðalánasjóði en félagið hefur einnig verið að kaupa á markaði.