Stórhætta þegar krani fór upp í háspennulínu

Mikil mildi þykir að ekki fór verr þegar krani gámaflutningabíls fór upp í háspennulínu við bæinn Kúskerpi í Skagafirði síðastliðinn laugardag. Eldingu laust niður í jörð undir gámaflutningabílnum að framan með mikilli sprengingu.

„Það er ótrúlegt að flutningabílstjórinn skuli vera til frásagnar og hann má prísa sig sælan að línunni sló út,“ segir Einar Halldórsson, bóndi á Kúskerpi.

Unnið er að því á Kúskerpi, sem er kúabú í Akrahreppi í Skagafirði, að reisa nýtt fjós á bænum. Síðastliðinn laugardag kom flutningabifreið með gám á heimreiðina. Krani bifreiðarinnar fór upp í Rángárvalla­línu 1, sem er byggðalínan sem tengir Eyjafjörð við Blönduvirkjun. Byggðalínan flytur um 100 MW og er allt að 130.000 volta spenna á línunni.

Þegar kraninn snerti línuna laust eldingu í jörð undir flutningabílnum að framanverðu og við það varð hávær sprenging. Rangárvallalínu sló út um leið enda hefði illa getað farið ef það hefði ekki gerst.

„Það voru menn að störfum í nálægð við atvikið að reisa fjósið. Það þykir mildi að ekki fór illa. Ef línunni hefði ekki slegið út hefði flutningabílstjórinn ekkert verið til frásagnar. Ljósbogi myndaðist undir bílnum með miklum hvelli,“ segir Einar bóndi á Kúskerpi.

Samkvæmt upplýsingum frá Landsneti var byggðalínan úti í um 90 mínútur. Málið er talið alvarlegt þar sem um byggðalínu er að ræða. Að þeirra mati skapaðist stórhætta á svæðinu. Lögregla var fengin á vettvang auk þess sem starfsmenn Rarik á Sauðárkróki könnuðu mögulegar skemmdir á línunni. Steinar Gunnarsson, varðstjóri lögreglunnar á Sauðárkróki, segir ótrúlegt að enginn hafi slasast í þessu atviki. „Það er ljóst að menn voru í stórhættu þegar óhappið átti sér stað,“ segir Steinar.

Óverulegar skemmdir urðu á línunni og var hún komin í notkun stuttu seinna. „Bílstjórinn stökk út úr bílnum um leið og hann heyrði sprenginguna. Hann náði svo að koma krananum niður með fjarstýringu. Okkur var nokkuð brugðið við þetta,“ segir Einar bóndi.

Fréttin birtist fyrst í Fréttablaðinu 22. mars