Innanríkisráðherra kallar tvo karla í nefnd um skipta búsetu barna

Fulltrúum í verkefnisstjórn innanríkisráðuneytisins sem undirbúa á heimild fyrir skiptri búsetu barna var fjölgað í gær. Bætt hefur verið við tveimur körlum en fyrir var nefndin skipuð fjórum fulltrúum þriggja ráðuneyta; þremur konum og einum karli.

Fréttablaðið greindi frá því fyrr sama dag að Jafnréttisstofa teldi fulla ástæðu til að kalla eftir skýringum frá stjórnvöldum á upphaflegri skipan nefndarinnar.

Kristín Ástgeirsdóttir, framkvæmdastýra Jafnréttisstofu, sagði í viðtali við Fréttablaðið að það væri skýrt markmið jafnréttislaga að koma á og viðhalda jafnrétti og jöfnum tækifærum kvenna og karla og jafna þannig stöðu kynjanna á öllum sviðum samfélagsins.

„Opinberir aðilar eiga að sjálfsögðu að ganga á undan með góðu fordæmi. Samkvæmt 15. grein jafnréttislaga ber að tilnefna bæði karl og konu. Það er svo þess sem endanlega skipar viðkomandi nefnd að sjá til þess að hún sé rétt skipuð nema að hlutlægar ástæður liggi fyrir skipaninni, t.d. sérstök sérfræðiþekking. Það er þó erfitt að sjá að það gildi í þessu tilviki en Jafnréttisstofa mun að sjálfsögðu kalla eftir skýringum á þessari skipan mála,“ sagði Kristín.

Þessu sjónarmiði jafnréttisstýru deila stjórnvöld greinilega, en eins og þekkt er varðar málið ekki síst rétt umgengnisforeldra sem eru 90 prósent karlar.

Kristín sagði það vonbrigði að sjá skipan eins og þessa, að þrjár konur og einn karl séu fengin til starfans, sem virðist ónauðsynlegt. „Ráðuneytin þurfa að vera betur vakandi en þar er sem betur fer undantekning að sjá svona dæmi,“ sagði Kristín.



Fréttin birtist fyrst í Fréttablaðinu 24. mars.