Emil verður með Haukum í kvöld

Emil Barja mun spila með Haukum gegn Hetti í lokaumferð Domino's-deildar karla í kvöld. Þetta staðfesti Ívar Ásgrímsson, þjálfari Hauka, við Vísi í dag.

Emil fékk tvö högg á lærið þegar Haukar unnu Njarðvíkinga á mánudagskvöldið en meiðslin eru ekki alvarleg.

„Hann æfði á fullu í gær og verður með í kvöld. Hann verður heldur ekki hvíldur og myndi örugglega fara í fýlu ef ég bæði hann um það,“ sagði Ívar í léttum tón en Haukar eru öruggir með fjórða sæti deildarinnar, hvernig sem leikir kvöldsins fara.

Haukar hafa unnið síðustu sjö leiki sína í deildinni og Ívar vill enda deildarkeppnina á áttunda sigrinum í röð.

„Við ætlum að keyra á þetta á okkar sterkasta liði. Það er stefnan að vinna leikinn í kvöld.“