Vilja svör um áhrif hitaveitu í Kjós

Veiðifélag Kjósarhrepps hefur óskað eftir svörum frá sveitarfélaginu um áhrif fyrirhugaðrar hitaveitu í Kjósinni á lífríki.

"Hefur verið skoðað hvort efnainnihald affallsvatns eða hiti geti haft áhrif á lífríki vatnasvæðisins Laxár í Kjós og Bugðu?" segir í fyrirspurn Veiðifélags Kjósarhrepps.

Einnig er spurt um hvað gert sé ráð fyrir miklu magni af affallsvatni á ári sem fari út í vatnasvæði Laxár í Kjós og Bugðu. "Hvert er efnainnihald vatnsins?" spyr veiðifélagið.

Guðmundur Magnússon, formaður veiðifélagsins, segir fyrirspurnina snúast um að fá svör formlega á blaði fyrir aðalfund félagsins. "Stjórn veiðifélagsins hefur ekki áhyggjur af þessum framkvæmdum, við höfum fylgst með þessu frá því boranir hófust," segir Guðmundur.

Samkvæmt upplýsingum á heimasíðu hreppsins verður unnið að hitaveituframkvæmdum á þessu ári og því næsta.

"Grófa verkplanið er að byrja uppi á borholusvæðinu í apríl 2016 og leggja lagnir sem leið liggur niður að Meðalfellsvatni, í byggðina kringum það og áleiðis vestur að Hvalfirði í byggðina þar. Önnur svæði koma inn árið 2017," segir á kjos.is.

Greinin/fréttin birtist fyrst í Fréttablaðinu 19. mars.