Eiginmaður Strelle sagður sturlaður af afbrýðisemi

Nú standa yfir réttarhöld yfir John Martin á Englandi, sem sakaður er um að hafa drepið konu sína, konsertpíanistann Natalie Strelle á hrottafenginn hátt. Hún var barin sundur og saman, svo illa að andlitsbein hennar voru laus frá afgangi höfuðkúpunnar og þá var hún kyrkt.

Klassíski heimurinn stendur á öndinni vegna þessa skelfilega máls, sem teygir anga sína til Íslands, en hjónin voru góðir vinir fiðlusnillingsins Hjörleifs Valssonar.

Hjörleifur sagði Vísi frá hinu stormasama sambandi þeirra Martins og Strelle í september í fyrrra.

Hjörleifur sagði meðal annars þá að flestir sem til þekktu hafi óttast, og í raun beðið þess, að sambandið myndi enda og þá með ósköpum. Hjörleifur hefur starfað með þeim báðum og Martin kom til Íslands og dvaldi hér á landi um hríð.

Indipendent fjallar um réttarhöldin en þar kom fram að Martin hafi misst stjórn á skapi sínu. Natallia Strelchenco, sem var 38 ára gömul af rússnesku bergi brotin, var einnig þekkt sem Natalia Strelle en hún fannst látin að heimili hennar og norska bassaleikaranum John Martin í fyrra.

Hún hafði verið lamin svo illa að hún kjálki hennar var algerlega í sundur og andlitsbeinin voru laus frá höfuðkúpunni.

Martin, sem er 48 ára gamall, var sagður sjúklega afbrýðisamur vegna þess að kona hans hafði notið miklu meiri velgengni á tónlistarsviðinu en hann sjálfur. Þetta rímar við það sem Hjörleifur sagði í viðtali Vísis, en Martin hafði að verulegu leyti snúið sér að heimasíðugerð og umboðsmennsku. Saksóknarinn Robert Hall segir: „Þetta mál snýst um stjórnlausa reiði, hreina og klára, sakborningurinn hafði ekki öðlast það sem hann sóttist eftir, missti stjórn á skapi sínu með þessum hroðalegu afleiðingum.“

Martin hins vegar neitar sök, hann segist reyndar ekki muna neitt frá kvöldinu skelfilega, sem var 30. ágúst. Talið er líklegt að verjandi hans muni bera við stundarbrjálæði.

Hins vegar virðist fátt benda til þess að hann sé saklaus. Þetta kvöld hafði pólskur víóluleikari, vinkona þeirra, dvalið að heimili þeirra og hún hefur borið að Martin hafi hent sjálfum sér og Strelchenko niður stigann áður en hann kyrkti hana. Konan flúði af vettvangi. Þegar lögreglan kom á vettvang var Martin á efri hæðinni og öskraði við handtökuna: „Drepið mig!“