Ríkið sýknað af kröfum um endurgreiðslu á snakktolli

Hæstiréttur hefur staðfest dóm Héraðsdóms Reykjavíkur þar sem íslenska ríkið var sýknað af kröfu fyrirtækjanna Haga, Aðfanga, Inness og Ölgerðarinnar um að fá endurgreiðslu á 59 prósenta tolls á innfluttu kartöflusnakki. Þessi tollur verður hins vegar afnuminn um næstu áramót samkvæmt ákvörðun Alþingis í desember.

Dómurinn hefur ekki verið birtur á vef Hæstaréttar en félag atvinnurekenda segir frá niðurstöðunni á vef sínum. Alls fór Ölgerðin fram á tæplega 225 milljón króna greiðslu frá ríkinu. Innnes fór fram á rúmar 54 milljónir og Hagar og Aðföng fóru fram á meira en 32 milljónir króna.

Sjá einnig: Snakktollur ríkisins ekki ólöglegur

Fyrirtækin sögðu meðal annars að tollur þessi samræmdist ekki kröfu um málefnalegan grundvöll skattheimtu hins opinbera. Fyrirtækin töldu að álagning þessi hafi verið byggð á svokallaðri verndarstefnu stjórnvalda gagnvart innlendum landbúnaði.

Félag atvinnurekenda segir íslenska ríkið hafa haldið því fram fyrir dómi að tollurinn væri ætlaður til almennrar tekjuöflunar, en væri ekki verndartollur fyrir innlenda framleiðslu. Ólafur Stephensen, framkvæmdastjóri Félags atvinnurekenda, segir málið allt hið ótrúlegasta.

„Eftir 20 ára gjaldtöku kannast ríkið allt í einu ekki við að þetta sé verndartollur. Ríkið segist vera að afla sér tekna með almennum hætti og að það sé bara tilviljun að himinhár tollur upp á 59% lenti á einni einstakri vöru,“ er haft eftir Ólafi á vef félagsins.

Hann segir ljóst að þessi tollur verndi engan íslenskan landbúna og að engar kartöflur, innlendar eða innfluttar, séu í íslensku snakki. „Þetta er augljóslega ekki almenn gjaldtaka og henni er augljóslega ætlað að vernda innlenda verksmiðjuframleiðslu, undir yfirskini tollverndar fyrir búvöruframleiðslu. Það er erfitt að sætta sig við þá niðurstöðu Hæstaréttar að þetta sé í lagi.“