Árásarmennirnir í París í aðalhlutverki í nýju myndbandi

Hluti þeirra manna sem stóðu að baki hryðjuverkaárásunum í París eru í aðalhlutverki í nýju myndbandi frá hryðjuverkasamtökunum sem kenna sig við íslamskt ríki.

Í myndbandinu sjást mennirnir afhöfða nokkra ónafngreinda gísla en myndbandið var tekið fyrir árásirnar í nóvember síðastliðnum en rataði fyrst á veraldarvefinn í kvöld. Nákvæm dagsetning á tökunum er þó á huldu. 

#ISIS Released a video shows the last words for the #ParisAttacks Executors #Syria #ISIL #Raqqa pic.twitter.com/x0PgOz6sOJ #Paris #security

— Int Intelligence (@IntIntelligence) January 24, 2016

Meðal þeirra sem framkvæma afhöfðanirnar er Bilal Hadfi, einn þeirra sem lét lífið í Parísarárásunum. „Þið eyðileggið heimili okkar og myrðið feður okkar, bræður, systur, mæður og börn,“ segir Hadfi og starir inn í myndavélina.

Þá bregður Abu Qital al-Farans einnig fyrir í myndbandinu en hann er talinn vera einn þeirra sem hóf skothríðina í Bataclan-tónleikahúsinu. Þar létu á níunda tug áhorfenda á tónleikum Eagles of Death Metal lífið.

Talið er að myndbandið eigi að vera til marks um síðustu orð mannanna áður en þeir héldu til Frakklands til að hrinda áætlunum sínum í framkvæmd.„Hver sá sem er í röðum óvinarins mun finna fyrir sverðum okkar,” heyrist í myndbandinu. Þá birtast myndir af þekktum kennileitum í Lundúnum, svo sem Tower Bridge og St. Paul’s dómkirkjunni.

Undir myndunum heyrist rödd segja að samtökin séu reiðubúin að gera árás „hvar sem er, hvenær sem er.“

Daily Mail birti brot úr myndbandinu á vef sínum í kvöld. Þar má sjá Samy Amimour hóta vantrúuðum.